મુંબઈ: રિતેશ દેશમુખના ડિરેક્શનમાં બનેલી અને છત્રપતિ શિવાજી મહારાજના જીવન પર આધારિત ફિલ્મ ‘રાજા શિવાજી’ બોક્સ ઓફિસ પર ઈતિહાસ રચી રહી છે. 1 મેના રોજ રિલીઝ થયેલી આ ફિલ્મે મરાઠી સિનેમામાં નવો બેન્ચમાર્ક સેટ કરતા ₹50 કરોડથી વધુનું ગ્રોસ કલેક્શન કરી લીધું છે અને અત્યાર સુધીની સૌથી વધુ કમાણી કરનારી ટોપ-5 મરાઠી ફિલ્મોની યાદીમાં શાનદાર એન્ટ્રી કરી છે.
બોક્સ ઓફિસ કલેક્શન અને કમાણીના આંકડા
સેકનિલ્ક (Sacnilk) ના રિપોર્ટ અનુસાર, ફિલ્મે અત્યાર સુધીમાં અંદાજિત ₹44 કરોડનું નેટ કલેક્શન કર્યું છે. જેમાંથી માત્ર મરાઠી વર્ઝનનું યોગદાન જ ₹30.5 કરોડ જેટલું છે.
-
ફિલ્મનું કુલ ઈન્ડિયા ગ્રોસ કલેક્શન ₹52.68 કરોડને પાર પહોંચી ગયું છે.
-
મંગળવારે ફિલ્મના કલેક્શનમાં સોમવાર કરતા 20.4% નો ઘટાડો નોંધાયો હતો, છતાં મરાઠી વર્ઝનમાં ₹3.35 કરોડની કમાણી થઈ હતી.
-
હિન્દી બેલ્ટમાં શરૂઆત ધીમી રહી હતી, પરંતુ ‘વર્ડ-ઓફ-માઉથ’ (Word of mouth) અને પોઝિટિવ રિવ્યુના કારણે હવે હિન્દી વર્ઝનની કમાણીમાં પણ મોટો ઉછાળો જોવા મળી રહ્યો છે.
મહારાષ્ટ્રમાં ટેક્સ-ફ્રી કરવા સીએમને પત્ર
ફિલ્મની પ્રચંડ સફળતા અને ઐતિહાસિક મહત્વને જોતા શિવસેના (UBT) ના નેતા અંબાદાસ દાનવેએ મહારાષ્ટ્રના મુખ્યમંત્રી દેવેન્દ્ર ફડણવીસને પત્ર લખીને ફિલ્મને ટેક્સ-ફ્રી કરવાની માંગ ઉઠાવી છે. તેમણે જણાવ્યું છે કે, છત્રપતિ શિવાજી મહારાજના મહાન કાર્યો યુવાનો અને સામાન્ય જનતા સુધી પહોંચે તે માટે ટિકિટ સસ્તી થવી જરૂરી છે, જેથી વધુ લોકો સિનેમાઘરો સુધી જઈ શકે.
બોલિવૂડ અને મરાઠી સ્ટાર્સનો જમાવડો
‘રાજા શિવાજી’ માત્ર તેની શાનદાર કહાની નહીં, પણ મોટી સ્ટારકાસ્ટને કારણે પણ દર્શકોને આકર્ષી રહી છે. રિતેશ દેશમુખે મુખ્ય ભૂમિકા ભજવવાની સાથે સાથે ડિરેક્શનની કમાન પણ પોતે જ સંભાળી છે. આ ફિલ્મમાં તેમની સાથે સંજય દત્ત, અભિષેક બચ્ચન, વિદ્યા બાલન, જેનેલિયા દેશમુખ અને ભાગ્યશ્રી જેવા બોલિવૂડ સ્ટાર્સ જોવા મળ્યા છે. આ ઉપરાંત મહેશ માંજરેકર, ફરદીન ખાન, સચિન ખેડેકર, અમોલ ગુપ્તે અને જીતેન્દ્ર જોશી જેવા દિગ્ગજ કલાકારોએ પણ મહત્વપૂર્ણ ભૂમિકાઓ ભજવી છે.
