અમદાવાદ / ધોળકા:
અમદાવાદ શહેર અને જિલ્લામાં પડેલા ભારે વરસાદના કારણે સર્જાયેલી પૂરની કટોકટીભરી પરિસ્થિતિમાં વહીવટી તંત્રની મદદ માટે આધુનિક ટેકનોલોજી વહારે આવી છે. ધોળકા વિસ્તારમાં પાણી ભરાઈ જવાના કારણે શાળાના બાળકો અને સ્થાનિક નાગરિકો ફસાઈ ગયા હતા. આ પૂરગ્રસ્તો સુધી મદદ પહોંચાડવા અને તેમનું ચોક્કસ લોકેશન શોધવા માટે મહેસાણા સ્થિત સ્ટાર્ટઅપ ‘પ્રાઈમ યુએવી’ (Prime UAV) ની વિશેષ ડ્રોન રેસ્ક્યૂ ટીમ તાત્કાલિક મેદાનમાં ઉતરી હતી.
દુર્ગમ વિસ્તારોમાં બોટ અને ટ્રેક્ટર મારફતે પહોંચી ટીમ
પૂરના પાણી ઘૂંટણસમાથી પણ વધુ ઊંડા હોવાના કારણે વાહનોની અવરજવર શક્ય ન હતી. આવી મુશ્કેલ પરિસ્થિતિમાં પ્રાઈમ યુએવીની ટીમે સ્થાનિક તંત્ર અને રાહત ટીમો સાથે મળીને બોટ અને ટ્રેક્ટર મારફતે પોતાના અત્યાધુનિક ડ્રોન અને ઓપરેટિંગ સિસ્ટમને પૂરગ્રસ્ત વિસ્તાર સુધી પહોંચાડ્યા હતા.
રાત્રિના અંધારામાં જીપીએસ અને હવાઈ સર્વેલન્સથી બચાવ કામગીરી
ઘટનાસ્થળે પહોંચેલી ટીમે દિવસ-રાત જોયા વિના સતત કામગીરી હાથ ધરી હતી. રાત્રિના અંધારામાં પણ વિઝિબિલિટી ધરાવતા ડ્રોન આકાશમાં ઉડાડીને નીચે મુજબની મહત્વપૂર્ણ કામગીરી કરવામાં આવી હતી:
-
GPS લોકેશન ટ્રેકિંગ: પૂરના પાણીમાં ફસાયેલા લોકો અને બાળકોનું ચોક્કસ લોકેશન ડ્રોનના જીપીએસ અને કેમેરા ટ્રેકિંગ દ્વારા શોધવામાં આવ્યું હતું.
-
હવાઈ સર્વેલન્સ: પૂરગ્રસ્ત વિસ્તારો, ગરકાવ થયેલા રસ્તાઓ અને મકાનોની લાઈવ સ્થિતિ જોઈને એનડીઆરએફ (NDRF) અને રાહત ટીમોને સાચો માર્ગ દર્શાવવામાં આવ્યો હતો.
-
ડ્રોનથી ફૂડ અને વોટર સપ્લાય: ડ્રોન નીચે ખાસ તૈયાર કરાયેલા પેલોડ બોક્સ મારફતે હવામાંથી જ સુરક્ષિત રીતે પીવાનું પાણી અને ફૂડ પેકેટ્સ ફસાયેલા લોકો સુધી પહોંચાડવામાં આવ્યા હતા.આ પણ જુઓ : https://youtu.be/GoTvK5vEN_M?si=sNTdxtenYwfxnMdZ
માનવતા અને સામાજિક જવાબદારીનું ઉત્કૃષ્ટ ઉદાહરણ
સામાન્ય રીતે કૃષિ, ફોરેસ્ટ સર્વે અને દવા છંટકાવ માટે કામ કરતી આ સંસ્થાએ આપત્તિના સમયે સંપૂર્ણપણે સ્વૈચ્છિક રીતે, કોઈપણ વ્યાવસાયિક સ્વાર્થ વગર માનવતાના ધોરણે આ કામગીરી કરી હતી.
પ્રાઈમ યુએવીના ફાઉન્ડર અને સીઈઓ પ્રદીપ પટેલે જણાવ્યું હતું કે, “આપત્તિના સમયે આધુનિક ટેકનોલોજીનો ઉપયોગ લોકોના જીવ બચાવવા માટે થાય એ જ અમારી ટેકનોલોજીની સાચી સફળતા છે.”
અત્રે ઉલ્લેખનીય છે કે ૨૦૧૯ માં શરૂ થયેલું ‘Prime UAV’ કેન્દ્ર સરકારના DPIIT દ્વારા માન્યતા પ્રાપ્ત છે. ધોળકા ખાતેની આ કામગીરીમાં પ્રદીપ પટેલ, હિતેન પટેલ, યાજ્ઞિક લખતરિયા, રાહુલ, દીપક અને હર્ષિલ પટેલે સતત વહીવટી તંત્ર સાથે રહીને સફળ ઓપરેશન પાર પાડ્યું હતું.
https://lalkaarnews.com/gujarat-cyber-fraud-e-zero-fir-1930-helpline/
