અમદાવાદ: ગુજરાત પોલીસના ઇતિહાસમાં જે અગાઉ ક્યારેય નથી બન્યું, તે ૧૯૯૭ બેચના સિનિયર આઇપીએસ (IPS) અધિકારી અનુપમસિંહ ગેહલોતે કરી બતાવ્યું છે. તેઓ અમદાવાદ શહેરના નવા પોલીસ કમિશનર (CP) તરીકે નિયુક્ત થતાંની સાથે જ તેમના નામે એક અનોખો અને અદ્ભુત રેકોર્ડ નોંધાયો છે. અનુપમસિંહ ગેહલોત ગુજરાતના સર્વપ્રથમ એવા પોલીસ અધિકારી બન્યા છે, જેઓ રાજ્યના ચારેય મુખ્ય મેગા સિટી — અમદાવાદ, વડોદરા, રાજકોટ અને સુરતના પોલીસ કમિશનર રહી ચૂક્યા હોય!
ચારેય મોટા શહેરોનો પાવરફુલ એક્સપિરિયન્સ
અનુપમસિંહ ગેહલોત આ અગાઉ સુરતના પોલીસ કમિશનર તરીકે ફરજ બજાવી રહ્યા હતા, જ્યારે વડોદરામાં તો તેઓ બે-બે વખત કમિશનર તરીકે કાયદો અને વ્યવસ્થાની સ્થિતિ સફળતાપૂર્વક સંભાળી ચૂક્યા છે. આ ઉપરાંત તેઓ રાજકોટના પણ સીપી રહી ચૂક્યા છે. ચારેય મોટા શહેરોના ભૌગોલિક અને ગુનાખોરીના ગ્રાઉન્ડ લેવલના વાતાવરણથી તેઓ ખૂબ જ સારી રીતે વાકેફ છે.
અમદાવાદની રગેરગથી છે વાકેફ
અમદાવાદ મહાનગર માટે અનુપમસિંહ ગેહલોત બિલકુલ નવા નથી. વર્ષો પહેલાં તેઓ અમદાવાદમાં જ ઝોન-૪ ના ડીસીપી (DCP) તરીકે ફિલ્ડમાં રહીને પ્રશંસનીય કામગીરી કરી ચૂક્યા છે. આ સિવાય તેમને સ્ટેટ ઇન્ટેલિજન્સ બ્યુરો (IB) માં લાંબો સમય કામ કરવાનો બહોળો અનુભવ છે અને તેઓ એન્ટી કરપ્શન બ્યુરો (ACB) ના ઇન્ચાર્જ વડા તરીકે પણ ભ્રષ્ટાચારીઓ સામે કડક કાર્યવાહી કરી ચૂક્યા છે.
એનાલિસિસ: ગુનેગારોની હવે ખેર નથી!
મેગા સિટી અમદાવાદમાં હાલના સમયમાં ટ્રાફિકની સમસ્યા, વધતો જતો સાયબર ક્રાઈમ અને ડ્રગ્સ માફિયાઓનું દૂષણ સૌથી મોટા પડકારો છે. આ પડકારો સામે લડવા માટે ગ્રાઉન્ડ લેવલના કડક વહીવટની જરૂર છે. અનુપમસિંહ ગેહલોત પોતાની ક્લીન ઈમેજ અને કડક કાર્યશૈલીને કારણે સરકારની ગુડબુકમાં મોખરે રહ્યા છે. તેમની પાસે આઈબી (IB) નું સ્માર્ટ માઈન્ડ છે, ચાર મોટા શહેરો હેન્ડલ કરવાનો અનુભવ છે અને સાથે સરકારનો પણ મજબૂત સપોર્ટ છે.
