જાણીતા પંજાબી સિંગર દિલજીત દોસાંજના લાઇવ કોન્સર્ટની મજા જ્યાં એક તરફ સંગીત પ્રેમીઓ અને ચાહકો માટે યાદગાર બની રહી હતી, ત્યાં બીજી તરફ સ્ટેડિયમની આસપાસ વસવાટ કરતા સ્થાનિક રહીશો માટે આ આયોજન કોઈ મોટી સજા સમાન સાબિત થયું હતું. કોન્સર્ટને પગલે તંત્ર દ્વારા કરવામાં આવેલા ટ્રાફિક ડાયવર્ઝન અને આડેધડ પાર્કિંગને કારણે સમગ્ર વિસ્તારમાં ભારે ટ્રાફિક જામના દ્રશ્યો સર્જાયા હતા, જેના લીધે સામાન્ય નાગરિકો કલાકો સુધી ટ્રાફિકમાં અટવાઈને પરેશાન થયા હતા.
સૌથી વધુ કફોડી હાલત સ્ટેડિયમ નજીકની સોસાયટીઓ અને રહેણાંક વિસ્તારોમાં રહેતા પરિવારોની થઈ હતી. ચુસ્ત પોલીસ બંદોબસ્ત અને બેરિકેડિંગને કારણે સ્થાનિક રહીશોને પોતાના જ ઘરે જવા માટે પોલીસ અને સુરક્ષાકર્મીઓ સમક્ષ આજીજી કરવી પડી હોવાની ચોંકાવનારી ફરિયાદો ઉઠી છે. કામકાજ પરથી પરત ફરતા લોકો, વૃદ્ધો અને મહિલાઓને લાંબા ચકરાવા લઈને ઘરે પહોંચવાની ફરજ પડી હતી, જેના કારણે રહીશોમાં તંત્રની વ્યવસ્થા સામે ભારે રોષ જોવા મળ્યો હતો.
કોન્સર્ટના અવ્યવસ્થિત આયોજન અને ટ્રાફિક મેનેજમેન્ટની ખામીઓ સામે સ્થાનિક નાગરિકોએ પોતાની વ્યથા ઠાલવતા આક્રોશ વ્યક્ત કર્યો હતો. રહીશોએ સ્પષ્ટ શબ્દોમાં જણાવ્યું હતું કે મનોરંજનના કાર્યક્રમો સામે અમને કોઈ વાંધો નથી, પરંતુ સ્થાનિક નાગરિકોની સુવિધા અને શાંતિના ભોગે આવા મોટા કોન્સર્ટનું આયોજન ન થવું જોઈએ. ભવિષ્યમાં આવા કાર્યક્રમો યોજાય ત્યારે રહેવાસીઓને હાલાકી ન પડે તેવી યોગ્ય વ્યવસ્થા કરવાની માંગ ઉઠી છે.
