ભારત અને પાકિસ્તાન વચ્ચેના તણાવપૂર્ણ સંબંધો વચ્ચે એક અત્યંત રસપ્રદ અને ચોંકાવનારો રાજકીય ઘટનાક્રમ સામે આવ્યો છે. એક સમયે સિંધુ જળ સમજૂતીના મુદ્દે ભારત વિરુદ્ધ ઝેર ઓકનારા અને હાથ કાપી નાખવાની ધમકી આપનારા પાકિસ્તાનના મંત્રી મુસાદિક મસૂદ મલિકનું ભારતની જમીન પર પગ મૂકતા જ જાણે કે હૃદય પરિવર્તન થઈ ગયું હોય તેવા દ્રશ્યો જોવા મળ્યા છે. ભારતમાં આયોજિત શાંઘાઈ કોઓપરેશન ઓર્ગેનાઈઝેશન (SCO) સિવિલાઇઝેશનલ ડાયલોગ ફોરમમાં ભાગ લેવા માટે આવેલા પાકિસ્તાની મંત્રીએ વડાપ્રધાન નરેન્દ્ર મોદીની નીતિઓ અને વિઝનની ખુલ્લા દિલે પ્રશંસા કરી છે.
આ આંતરરાષ્ટ્રીય ફોરમ દરમિયાન મુસાદિક મસૂદ મલિક વડાપ્રધાન નરેન્દ્ર મોદી દ્વારા રજૂ કરવામાં આવેલા ‘ડિજિટલ રિપોઝિટરી’ (Digital Repository)ના પ્રસ્તાવના રીતસરના ચાહક બની ગયા હતા. તેમણે PM મોદીના આ ડિજિટલ પહેલના વિચારને આવકારીને તેનું સંપૂર્ણ સમર્થન જાહેર કર્યું હતું. એટલું જ નહીં, પોતાના વલણમાં મોટો બદલાવ દર્શાવતા પાકિસ્તાની મંત્રીએ વડાપ્રધાન નરેન્દ્ર મોદી સહિત આ કાર્યક્રમમાં ઉપસ્થિત રહેલા તમામ વૈશ્વિક નેતાઓને પાકિસ્તાન આવવા માટે સત્તાવાર આમંત્રણ પણ પાઠવ્યું હતું, જે આંતરરાષ્ટ્રીય રાજદ્વારી વર્તુળોમાં ચર્ચાનો વિષય બન્યું છે.
