‘આંદોલનના નામે આનંદીબેન પટેલને હટાવવાનું ષડયંત્ર કોણે રચ્યું?’: પાટીદાર નેતા વરુણ પટેલે ‘પુંજ કમિશન’નો રિપોર્ટ જાહેર કરવાની કરી માગ
પાટીદાર અનામત આંદોલન અને પૂર્વ મુખ્યમંત્રી આનંદીબેન પટેલની માફીના મુદ્દે ગુજરાતના રાજકારણમાં ચાલી રહેલી નિવેદનબાજી વચ્ચે પાટીદાર નેતા વરુણ પટેલનું એક મોટું નિવેદન સામે આવ્યું છે. વરુણ પટેલે સોશિયલ મીડિયા પર એક સૂચક પોસ્ટ કરીને સવાલ ઉઠાવ્યો છે કે આંદોલનના નામે આનંદીબેન પટેલને હટાવવાનું ષડયંત્ર કોણે રચ્યું હતું? તેમની આ પોસ્ટ બાદ રાજ્યના રાજકીય વર્તુળોમાં ફરી એકવાર ભારે ચર્ચા જાગી છે.
વરુણ પટેલે સોશિયલ મીડિયા પોસ્ટમાં કઈ માગણીઓ કરી?
પાટીદાર નેતા વરુણ પટેલે ભૂતકાળની ઘટનાઓનું સત્ય બહાર લાવવા માટે નીચે મુજબની મુખ્ય માગણીઓ રજૂ કરી છે:
-
આનંદીબેનને હટાવવા પાછળ કોણ હતું તે જાણવાની માગ: વરુણ પટેલે સવાલ ઉઠાવતા કહ્યું કે, “આંદોલનના નામે આનંદીબેન પટેલને હટાવવાનું ષડયંત્ર કોણે રચ્યું?” તેમણે આનંદીબેનને મુખ્યમંત્રી પદેથી હટાવવા પાછળ કયા પરિબળો અને કોણ જવાબદાર હતું તે સત્ય બહાર લાવવાની માગ કરી છે.
-
‘પુંજ કમિશન’નો રિપોર્ટ જાહેર કરવાની માગ: તેમણે આંદોલન સમયની તપાસનો ઉલ્લેખ કરતાં જણાવ્યું કે, પાટીદાર સમાજ પર થયેલા દમનની તપાસ કરનાર પંચ (પુંજ કમિશન) નો રિપોર્ટ જાહેર કરવામાં આવે. વરુણ પટેલે સ્પષ્ટ શબ્દોમાં કહ્યું કે, “જો ‘પુંજ કમિશન’નો રિપોર્ટ જાહેર કરો તો સમગ્ર હકીકત સામે આવશે.”
પાટીદાર સમાજના અગ્રણીઓ દ્વારા આંદોલન સમયની ઘટનાઓ પર અલગ-અલગ પ્રતિક્રિયાઓ આપવામાં આવી રહી છે, ત્યારે વરુણ પટેલની આ સોશિયલ મીડિયા પોસ્ટે તપાસ પંચના રિપોર્ટ અને તત્કાલીન રાજકીય ષડયંત્રોની ચર્ચાને ફરી જીવંત કરી છે.
