દિલ્હી / ઇન્ટરનેશનલ બિઝનેસ બ્રેકિંગ:
વૈશ્વિક બજારમાંથી દેશના અર્થતંત્ર અને સામાન્ય જનતા માટે અત્યંત રાહતજનક સમાચાર સામે આવ્યા છે. આંતરરાષ્ટ્રીય બજારમાં કાચા તેલના (Crude Oil) ભાવમાં અચાનક મોટો ઘટાડો નોંધાયો છે, જેમાં ક્રૂડ ઓઈલના ભાવમાં ૮ ટકાથી વધુનો ધરખમ ઘટાડો થતાં પ્રતિ બેરલ કિંમત હવે $૯૫ ની સપાટીથી પણ નીચે સરકી ગઈ છે.
ભાવ ઘટવા પાછળનું મુખ્ય કારણ:
આંતરરાષ્ટ્રીય નિષ્ણાતોના જણાવ્યા અનુસાર, પશ્ચિમ એશિયામાં ચાલી રહેલા સંકટ અને તણાવનો હવે રાજદ્વારી સ્તરે ઉકેલ આવવાની આશા બંધાઈ છે, જેના કારણે વૈશ્વિક બજારમાં તેલની આપૂર્તિને લઈને અનિશ્ચિતતા ઘટી છે અને ભાવ નીચે આવ્યા છે.
ભારતને થશે મોટો ફાયદો:
ઉલ્લેખનીય છે કે ભારત તેની જરૂરિયાતનું મોટું આયાતી તેલ વિદેશથી મંગાવે છે. ક્રૂડ ઓઈલ સસ્તું થવાથી ભારતનું વિદેશી હુંડિયામણ અને આયાત બિલ (Import Bill) ઘટશે. આનાથી દેશમાં મોંઘવારી કાબૂમાં રહેવામાં મોટી મદદ મળશે તેમજ ભારતીય બજાર અને શેરબજારને પણ નવું પ્રોત્સાહન મળવાની પૂરેપૂરી શક્યતા છે.
