અમદાવાદ / બિઝનેસ બ્રેકિંગ:
દિવાળીના પર્વ અને તહેવારોની રોનક વચ્ચે ગુજરાતની સામાન્ય જનતાના ખિસ્સા પર વધુ એક મોટો આર્થિક આઘાત લાગ્યો છે. અદાણી ટોટલ ગેસ દ્વારા સીએનજી (CNG) ના ભાવમાં તોતિંગ વધારો ઝીંકવામાં આવ્યો છે, જેના કારણે હવે સીએનજીના ભાવ સીધા ₹૧૦૦ ની સપાટીને વટાવી ગયા છે.
પ્રતિ કિલો ₹૨.૩૦નો વધારો:
અમદાવાદ સહિત રાજ્યના વિવિધ વિસ્તારોમાં અદાણી સીએનજીના પ્રતિ કિલો ભાવમાં સીધો ₹૨.૩૦ નો વધારો કરવામાં આવ્યો છે. અગાઉ જે સીએનજી પ્રતિ કિલો ₹૯૮.૪૭ ના ભાવે ઉપલબ્ધ હતો, તે હવે વધીને સીધો ₹૧૦૦.૭૭ પ્રતિ કિલો થઈ ગયો છે.
નોકરીયાત વર્ગ અને વાહનચાલકો મુશ્કેલીમાં:
તહેવારોની ખરીદી અને અવરજવર ટાણે જ ઇંધણના ભાવ વધવાથી રોજબરોજ નોકરી-ધંધે જતા મધ્યમવર્ગીય લોકો, સીએનજી રિક્ષા અને કાર ચાલકોના બજેટ પર ભારે અસર પડી છે. એક તરફ ખાદ્ય ચીજવસ્તુઓ અને બીજી તરફ સીએનજી મોંઘું થતા તહેવારોની મોસમમાં મોંઘવારીનો દોર વધુ મજબૂત બન્યો છે.
