અમદાવાદ: શહેરમાં ગેરકાયદે પ્રવૃત્તિઓ અને જુગારના અડ્ડાઓ સામે ક્રાઈમ બ્રાન્ચની પીસીબી (પ્રોટેક્શન ઓફ ક્રાઈમ બ્રાન્ચ) સ્ક્વોડે લાલ આંખ કરી છે. શહેરકોટડા પોલીસ સ્ટેશનની હદમાં ધમધમી રહેલા એક મોટા જુગારધામ પર PCB ટીમે અચાનક દરોડો પાડીને ૨૧ જેટલા પત્તાપ્રેમીઓને રંગેહાથ ઝડપી પાડ્યા છે. આ સફળ ઓપરેશનથી સ્થાનિક પોલીસની સતર્કતા સામે ગંભીર સવાલો ઊભા થયા છે.
અશોકમીલ ઘાંચીની ચાલીમાં PCBનો સપાટો મળતી વિગતો અનુસાર, PCB સ્ક્વોડને ચોક્કસ બાતમી મળી હતી કે શહેરકોટડા વિસ્તારમાં આવેલી અશોકમીલ ઘાંચીની ચાલીમાં મોટા પાયે જુગારનો અડ્ડો ચાલી રહ્યો છે. બાતમીના આધારે પોલીસે દરોડો પાડતાં સ્થળ પર નાસભાગ મચી ગઈ હતી. જોકે, ટીમે ઘેરાબંધી કરીને જુગાર રમતા ૨૧ શખ્સોને ઝડપી લીધા હતા. પોલીસે દરોડા દરમિયાન રોકડ રકમ, મોબાઈલ ફોન સહિત કુલ ₹૧,૮૩,૦૦૦નો મુદ્દામાલ કબ્જે કર્યો છે.
શહેરકોટડા પોલીસની કામગીરી પર સવાલોના ઘેરા સ્થાનિક પોલીસ સ્ટેશનની હદમાં આટલા મોટા પાયે જુગારધામ ચાલતું હોવા છતાં સ્થાનિક પોલીસને કેમ કોઈ ગંધ ન આવી, તે સૌથી મોટો પ્રશ્ન બન્યો છે. જ્યારે પણ ઉચ્ચ સ્તરીય સ્ક્વોડ કે PCB સ્થાનિક હદમાં આવીને રેડ કરે છે, ત્યારે સ્થાનિક પોલીસની રહેમનજર કે નિષ્ક્રિયતા સામે શંકાની સોય ચીંધાતી હોય છે. આ ઘટનાને પગલે શહેરકોટડા પોલીસ સ્ટેશનના સ્ટાફ અને બીટ ઇન્ચાર્જ સામે ખાતાકીય તપાસ થાય છે કે કેમ તેના પર સૌની નજર ટકેલી છે.
