ગુજરાત / વેધર બ્રેકિંગ:
ગુજરાતના હવામાનને લઈને એક અત્યંત મોટા અને ચોંકાવનારા સમાચાર સામે આવ્યા છે. જાણીતા હવામાન નિષ્ણાત અંબાલાલ પટેલે રાજ્યના હવામાનમાં મોટા પલટાની અને આગામી દિવસોમાં માવઠાથી લઈને ચક્રવાત સુધીની મોટી આગાહી કરી છે, જેના કારણે ખેડૂતો અને તંત્રમાં ચિંતાનું મોજુ ફરી વળ્યું છે.
૩ નવેમ્બર સુધી ક્યાં વરસી શકે છે વરસાદ?
અંબાલાલ પટેલની આગાહી મુજબ, આગામી ૩ નવેમ્બર સુધીમાં દક્ષિણ સૌરાષ્ટ્ર, જૂનાગઢ, ગીર સોમનાથ, જામનગર, અમરેલી, દેવભૂમિ દ્વારકા અને પોરબંદરના કેટલાક ભાગોમાં ગાજવીજ અને ભારે પવન સાથે કમોસમી વરસાદ (માવઠું) વરસવાની પ્રબળ શક્યતા છે. આ ઉપરાંત રાજકોટ અને દક્ષિણ ગુજરાતના કેટલાક વિસ્તારોમાં પણ વાતાવરણ પલટાશે.
નવેમ્બર અને ડિસેમ્બરમાં વાવાઝોડા અને ચક્રવાતની આગાહી:
હવામાન નિષ્ણાતના જણાવ્યા અનુસાર, બંગાળના ઉપસાગરમાં ૩ નવેમ્બર આસપાસ નવી સિસ્ટમ બનશે. ત્યારબાદ ૬ થી ૯ નવેમ્બર દરમિયાન મજબૂત સિસ્ટમ, ૧૨ થી ૧૪ નવેમ્બરે વાદળછાયું વાતાવરણ, ૧૬ નવેમ્બરે બંગાળના ઉપસાગરમાં મજબૂત સિસ્ટમ અને ૧૮ થી ૨૨ નવેમ્બર દરમિયાન વાવાઝોડું બનવાની શક્યતા છે. એટલું જ નહીં, ડિસેમ્બર મહિનાની શરૂઆતમાં પણ બંગાળના ઉપસાગરમાં ચક્રવાત સર્જાઈ શકે છે. બંગાળના ઉપસાગર અને અરબી સમુદ્રની આ હલચલને કારણે ગુજરાતમાં આગામી દિવસોમાં વારંવાર હવામાન બદલાવની સંભાવના છે.