ગાંધીનગર / કૃષિ બ્રેકિંગ:
ગુજરાત સરકાર દ્વારા તાજેતરમાં ચાર જિલ્લાઓને દુષ્કાળગ્રસ્ત જાહેર કરી હેક્ટર દીઠ ₹૮,૫૦૦ની સહાય આપવાની જાહેરાત બાદ નવો વિવાદ સર્જાયો છે. રાજ્યના અસંખ્ય વિસ્તારોમાં ઓછો વરસાદ થયો હોવા છતાં અન્ય પ્રભાવિત તાલુકાઓને સહાયમાંથી બાકાત રાખવામાં આવતા ખેડૂતોમાં ભારે રોષ જોવા મળી રહ્યો છે.
૪૫ તાલુકાઓમાં વરસાદની મોટી ઘટ:
રાજ્યના ૧૫ જિલ્લાના ૪૫ તાલુકાઓમાં ૪૦% થી લઈને ૭૦% સુધી વરસાદની વ્યાપક ઘટ નોંધાઈ છે, છતાં સરકારે તેમને દુષ્કાળગ્રસ્ત યાદીમાંથી બહાર રાખ્યા છે. આંકડા મુજબ, રાજકોટ જિલ્લાના ઉપલેટા તાલુકામાં સૌથી વધુ ૭૦.૧૨% વરસાદની ભારે ઘટ નોંધાઈ છે, જેના કારણે ખેડૂતોનો પાક નિષ્ફળ ગયો છે.
આંદોલનની ચીમકીથી રાજકારણ ગરમાયું:
સરકારની આ પક્ષપાતી નીતિ સામે વિવિધ ખેડૂત આગેવાનો અને સંસ્થાઓએ વિરોધ નોંધાવી આંદોલનની કડક ચીમકી આપી છે. વંચિત રહેલા તમામ ૪૫ તાલુકાઓને યોગ્ય સહાય આપવાની માંગ સાથે રાજ્યભરમાં આ મુદ્દો અત્યંત ગરમાયો છે.