પહેલો દિવસ — માતા શૈલપુત્રી: શરૂઆત એટલે સ્થિરતા
નવરાત્રીના પાવન અવસર પર ભક્તો માતાજીની આરાધનામાં લીન થઈ ગયા છે. નવરાત્રીના પ્રથમ દિવસે દેવીના ‘શૈલપુત્રી’ સ્વરૂપની પૂજા કરવાની વિશેષ પરંપરા છે. ‘શૈલપુત્રી’નો અર્થ થાય છે—પર્વતની પુત્રી. પૌરાણિક માન્યતા અનુસાર દેવી પાર્વતીનું આ સ્વરૂપ હિમાલયના રાજા હિમાવતના ઘરે પ્રગટ થયું હતું. તેમના એક હાથમાં ત્રિશૂલ અને બીજા હાથમાં કમળ શોભે છે, અને તેમનું વાહન વૃષભ (બળદ) છે.પરંતુ, શૈલપુત્રીની આ કથા માત્ર ધાર્મિક આસ્થા સુધી સીમિત નથી, પણ તે આપણા રોજિંદા જીવન માટે એક મોટો સંદેશ આપે છે.
પર્વત શું દર્શાવે છે? અડગતા અને સ્થિરતા!
ગમે તેટલું તોફાન આવે, વરસાદ પડે કે પવન ફૂંકાય, પર્વત ક્યારેય પોતાની જગ્યા છોડતો નથી. તે હંમેશાં અડગ અને સ્થિર રહે છે. આ જ કારણ છે કે નવરાત્રીનો પહેલો દિવસ આપણને શીખવે છે કે જીવનમાં ગમે તેવી વિકટ પરિસ્થિતિ આવે, પણ મન ડગમગવું ન જોઈએ.
આજના યુગમાં આ સંદેશનું મહત્વ:
આજના સમયમાં આપણે નાની-નાની મુશ્કેલીઓથી ઘબરાઈ જઈએ છીએ. વ્યાપારમાં નુકસાન થાય, નોકરીમાં ટેન્શન આવે કે જીવનમાં નિષ્ફળતા મળે એટલે તરત જ આપણે આપણા નિર્ણયો બદલી નાખીએ છીએ કે હિંમત હારી જઈએ છીએ. માતા શૈલપુત્રી આપણને યાદ અપાવે છે કે કોઈ પણ મોટી સફર કે સફળતાની શરૂઆત કરતાં પહેલાં મનને સ્થિર અને સંકલ્પબદ્ધ બનાવવું સૌથી વધુ જરૂરી છે.
આજનો જીવનસંદેશ:
“જીવનમાં ગમે તેટલા ઉતાર-ચઢાવ આવે, પણ તમારો સંકલ્પ પર્વત જેવો મજબૂત હોવો જોઈએ. કારણ કે સ્થિર મન જ સાચા નિર્ણય લઈ શકે છે.”