આઈપીએલ ૨૦૨૬ (IPL 2026) ના એલિમિનેટર મુકાબલામાં રાજસ્થાન રોયલ્સે સનરાઇઝર્સ હૈદરાબાદને ૪૭ રનથી માત આપીને ક્વોલિફાયર-૨ માં ધમાકેદાર એન્ટ્રી કરી લીધી છે. મુલ્લાનપુરના મહારાજા યાદવેન્દ્ર સિંહ સ્ટેડિયમમાં રમાયેલી આ મેચ સંપૂર્ણપણે રાજસ્થાનના યુવા ઓપનર વૈભવ સૂર્યવંશીના નામે રહી હતી, જેણે સિક્સરોનો એવો વરસાદ કર્યો કે ક્રિકેટ જગતના દિગ્ગજો પણ આશ્ચર્યચકિત થઈ ગયા છે.
ક્રિસ ગેલનો ૧૪ વર્ષ જૂનો રેકોર્ડ ધ્વસ્ત
વૈભવ સૂર્યવંશીએ આ મેચ દરમિયાન વેસ્ટ ઈન્ડિઝના લિજેન્ડ ક્રિસ ગેલનો ૧૪ વર્ષ જૂનો ઐતિહાસિક રેકોર્ડ તોડી નાખ્યો છે. વૈભવના નામે હવે આ સીઝનમાં ૬૫ સિક્સ થઈ ગઈ છે, જે કોઈ એક આઈપીએલ સીઝનમાં કોઈ પણ બેટર દ્વારા ફટકારવામાં આવેલા સૌથી વધુ છગ્ગા છે.
૬૦૦ રન બનાવનાર સૌથી યુવા ખેલાડી
માત્ર ૧૫ વર્ષની નાની ઉંમરે આઈપીએલ રમી રહેલો વૈભવ સૂર્યવંશી લીગના ઇતિહાસમાં એક જ સીઝનમાં ૬૦૦થી વધુ રન બનાવનારો વિશ્વનો સૌથી યુવા ખેલાડી બની ગયો છે. હૈદરાબાદ સામેની કરો યા મરો મેચમાં તેણે માત્ર ૧૬ બોલમાં તોફાની ફિફ્ટી ફટકારી હતી. આઈપીએલ કરિયરમાં આ પાંચમી વખત છે જ્યારે તેણે ૨૦ કે તેથી ઓછા બોલમાં અર્ધસદી પૂરી કરી હોય.
“સદીઓ તો થતી રહેશે, અમારું લક્ષ્ય ટ્રોફી છે”
મેચ બાદ જ્યારે વૈભવને સૌથી ઝડપી સદીના રેકોર્ડ વિશે પૂછવામાં આવ્યું ત્યારે તેણે ખૂબ જ પરિપક્વતા પૂર્વક જવાબ આપતા કહ્યું, “મને આઉટ થયા પછી જ આ રેકોર્ડ વિશે ખબર પડી. તે સમયે મારું પૂરું ધ્યાન ફક્ત ટીમ માટે વધુમાં વધુ રન બનાવવા પર હતું. સદીઓ તો આગળ પણ બનતી રહેશે, પરંતુ અત્યારે અમારું પૂરું ધ્યાન એ વાત પર છે કે રાજસ્થાન રોયલ્સ માટે ટ્રોફી કેવી રીતે જીતવી.”
